فنادق دهب

تنزل فين في دهب؟


إنت و دماغك.. الاختيارات كتير من أول الفنادق ال ٥ نجوم لحد الكامبات باختلاف مستوياتها

الكامب بيبقي زي فندق صغير مش زي الكامبات المتعارف عليها في باقي سينا اللي بتبقي أشبه بالعشش و لو إن ده موجود.. لكن كامبات دهب في المجمل نضيفة جدا و آدميه جدا و معظمها مكيف..

عشان تتخيل أكتر. الكامب كأنه فندق صغير . غرفة مكيفه في معظم الأحوال و بحمام خاص للغرفة.

الفرق بينه و بين الفندق انك ممكن متلاقيش تليفزيون ولا تلاجة في الغرفه و معظم الكامبات مفيهاش حمام سباحة زي الفنادق. لكن الكامبات بصراحه ليها طعم و موود خاص هيحسسك إنك فعلا روحت دهب و زورت مكان مختلف.

لو إختارت كامب علي البحر غالبا هتبقي المنطقه اللي بتفطر فيها مفتوحه علي البحر. هتفطر على أحلي منظر ممكن تفتح عينك عليه و هو منظر الجبل مع البحر.

الفطار غالبا بيبقي اورينتال ( اللي هو الفطار المصري.. فول.. طعميه) أو أمريكان ( بيض و هوت دوج.زبده ..مربي….) أو إنجليش ( شبه الامريكان مع إختلاف الطريقه) و ممكن يبقي فاكهه.

منيو غالبا بتبقي شبه بعض في كل الكامبات و بتختار نوع بيتعملك بالطلب.

معظم الكامبات اللي على البحر بيبقي لها قاعده جميله الوانها مميزه على البحر تقدر تقعد فيها لكن ملهاش شاطئ . هي بتبص علي البحر الصخري اللي ميسمحش بالسباحة و دي برضوا ميزه انك تستمتع بمنظر البحر مع الجبل فاضي من غير ما تشوف حد في البحر.

لو نازل في كامب و عايز تنزل البحر ممكن تروح شاطئ اللاجون و ده شاطئ عام و رملي مش صخري تقدر تعوم فيه بسهولة.

نيجي بقي للفنادق.. و دي زيها زي أي فندق في أي مكان.
غرفة بتكييف و تلاجة و تليفزيون و حمام و الفطار بيبقي في مطعم الفندق اللي غالبا بيقي مقفول او مش شايف البحر . لكن بيبقي فيه حمام سباحة و شاطئ خاص هيوفر عليك إنك تروح شاطئ خارجي لو عايز تنزل البحر.

معظم الفنادق بتعمل day use . يعني إيه؟ يعني ممكن نبقي نازل في كامب عادي و تروح في يوم فندق من الفنادق تستخدم الشاطئ أو حمام السباحة و تقضي اليوم بس غالبا الفنادق بتدي الميزه دي في أيام غير الاعياد و الأجازات الرسمية و ده طبيعي لأن بيبقي عندهم ضغط في الأيام دي.

سعر ال day use ممكن يبقي في حدود ٢٠٠ جنيه للفرد او يزيد شويه على حسب الفندق.

لو هتختار تنزل في فندق خد بالك إن الفنادق ناحية اللاجون بتبقي شواطئها رملية.. الفنادق اللي الناحيه التانيه بتبقي شواطئ صخريه لكن ممكن تنزل فيها.. متبقاش مريحه أوي في السباحه خصوصا لو انت مش بتعرف تعوم كويس أو معاك أطفال لأن الصخر ممكن يعور.. فا خد بالك إنت بتحجز فندق فين عشان متتفاجئش إنك مش مرتاح في الشاطئ.

دي تقسيمة الفنادق بأسعارها تقريبة

فنادق ٥ نجوم: أسعارها بتتراوح بين 1230 و 2220 جنيه لليلة.

 و أشهرها فندق ميرديان و 

Casa d’or dahab

فنادق ٤ نجوم: و بتتراوح أسعارها بين 750 ل 1850 جنيه لليله
swiss inn.. Jazz dahbya .. ecotel bay اشهرها: 

فنادق ٣ نجوم: أسعارها بتبدأ من 220 جنيه لليله
و اشهرها: تروبيتل أواسيس .. دانيلا دهب و دهب باراديس

فنادق نجمتين: أسعارها بتتراوح بين 490 ل 650 جنيه لليله
و اشهرها: نيو سيفنكس ريسورت و أوريكانا

Leave a Comment