دهب حالة مش مجرد مكان حلو . مكان من أجمل الأماكن اللي ممكن تزورها

مكانها تقريبا ١٠٠ كم من شرم الشيخ و ممكن توصلها باكتر من وسيلة مواصلات سواء من القاهره او من أي محافظه تانيه.

ممكن نقسم المدينه لقسمين ، جنوب المدينه و هناك قرية العسلة بشكل الحياة البدوية البسيطة و سكان القرية معظمهم سكان البلد الأصليين،
و شمال المدينة و ده الجزء اللي فيه الاسواق والأماكن الترفيهية.

دهب بلد طبيعية مخربتش كتير بتأثير التكنولوجي والحداثة .. مكان طبيعي بطبيعة جبلية وبحرية وصحراوية في نفس الوقت للي بيحب الطبيعة و مش بيدور على الفخامه.

دهب مش بس مشهوره بشواطئها الصافية ومواقع الغطس الطبيعية الغنية بالشعاب المرجانية. دهب كمان مشهوره بالطاقة اللي بتديها لكل واحد زارها تخليه لازم يرجع يزورها تاني.

هيخطف عينك نقاء ونضافة الماية اللي لسا متوسختش
وهتحب نقاء الهوا اللي من غير تراب اللي له ريحه مميزه يخليك مبسوط و مسترخي طول الوقت.

منظر الجبال مع البحر الصبح و السماء اللي مليانه نجوم بليل. طبيعة فعلا مبهره.

ألوان دهب مبهجه. لو غطست هتلافي ألوان الأسماك و الشعب مبهجه . لو قاعد علي البحر هتلاقي ألوان السما مع الرمله و الجبل مبهجه . حتي المطاعم… الكافيهات.. اللبس.. البازارات ..كله لو نفس الطابع المبهج.

كل الحاجات دي آثرت في روح و شخصية أهل المكان.
أهل البلد لطاف و متعاونين إلى ابعد درجه . بتحس بالترحاب والأمان و التعايش فى كل مكان تروحه
التعايش مش بس بين الناس . لا و مع الحيوانات كمان.

هتخطف عينك الكلاب الاليفة اللي هتحبها وهتحبك.

دهب تعتبر مشتي بس أحسن وقت للزياره بيبقي من شهر مارس لشهر يونيو.
الجو في الوقت ده بيبقي معتدل و مشمس و بتتفادي أمطار الشتا و درجة الحراره العالىة نسبيا في الصيف لكن برضوا تقدر تزورها طول السنه و تتبسط.

دهب فيها أمكان سياحيه كتير من أول الممشي السياحي اللي مليان مطاعم و كافيهات على البحر قاعدتهم حلوة جدا و اسعارهم معقوله . لأماكن الغطس اللي أشهرها البلو هول .. الثري بولز . غير المحميات الطبيعيه زي ابو جالوم اللي ممكن برضوا تغطس فيها.

شواطئ دهب كلها صخريه ماعادا شاطئ واحد بس في منطقة اللاجونا اللي تعتبر مميزه جدا لأنها الشاطئ الرملي الوحيد.
و ده شاطئ مجاني للي مش بيفضل ينزل فى فندق و فيه كمان فنادق بتطل على نفس منطقه اللاجونا عشان لو بتفضل الفنادق تقدر تستمع بالشاطئ الرملي

Leave a Comment