الغطس في دهب

دهب.. غطس

دهب من فوق المايه ممكن يكون فيها أماكن كتير شبه بعض. لكن من تحت الميه غير و عشان كده الغطس من أحلى الحاجات اللي ممكن تعملها. يعني اللي راح دهب و مغطسش يبقي مراحش دهب.

ببساطة في نوعين للغطس نوع For Fun ليه معدات معينة و ليه ناسه و الأماكن بتاعته و نوع اصعب للاعماق الاكبر ليه معدات معينة و محتاج ناس عندها خبرة في الغطس خصوصا لو هتغطس في مكان خطير.

لو إنت من هواة الغطس يعني مش محترف أو أول مره تغطس ركز في أخر أربع أماكن اللي هما: اللايت هاوس. ثري بولز و إيل جاردن.

هتحتاج إيه؟

هتحتاج في معظم الأحيان لتأجير المعدات من مركز غطس و ممكن تستعين بمدرب ينزلك غطسه تجرببيه إسمها غطسة انترو اقصى عمق ليها بيكون ١٠ و اقصى وقت بيكون ٢٠ دقيقة.
لو عندك اي مشاكل صحية لازم تقولها للمدرب و هو هيديك تعليمات وبينزل بيك عمق ٢ متر و بالاشارات بيتأكد انك مفيش مشاكل.

مش هتحتاج حاجة تقريبا معاك من بره مركز الغطس. اللي ممكن حتاجه سبراي بيترش على الماسك عشان يمنع يتكون عليه شبوره و تشوف كويس و انت تحت المايه و دي طبعا حاجه اختياريه لو عايز تجيبها

أفضل وقت للغطس:
طول السنه تقدر تغطس لأن درجة حراره الميه مناسبه لكن أفضل الشهور في درجة الحراره هي إبريل .. سبتمبر.. أكتوبر.. نوفمبر.

أماكن الغطس:

  1. البلو هول:

بدأنا بيها أشهر مناطق الغطس فى دهب و أخطرها برضوا.. لو إنت من الناس اللي هتغطس For fun يبقي متجربش هناك و هنقولك كمان شويه إيه الأماكن اللي تناسبك.
ممكن تعمل سنوركلينج و ده أقل خطر و لو لبست لايف جاكيت يبقي أحسن .

أما بالنسبه للي غطس قبل كده فهي آه من أخطر أماكن الغطس ولكن من أحلي الأماكن و الغطاسين المحترفين بياخدوا الغطس في المكان ده تحدي و ساعات المغامره متبقاش محسوبه.

إزاي اتكونت البلو هول أو الثقب الأزرق؟

من ملاين السنين كان مستوي المياه منخفض عن كدة، و دا كان كهف عادي جدا. مستوي المياه ارتفع و سقف الكهف تحطم، و الحطام فتح فتحة في جدار الكهف.

طيب ايه الميزة فيه و ليه هو مكان خطير؟

المكان ده عمقه 120M تحت المياه، عند ال 56M في فتحة “Arch” في جدار الكهف عاملة نفق بيطلع علي ال Open Sea العمق هناك اكتر من 1000M

المميز بقي انك لو غطست لحد الفتحة دي و بصيت فوق حتلاقي ان الدنيا ضلمة “حتي لو كنت بتغطس الصبح” لكن لو بصيط تحت ناحية ال “Arch” هتلقيه مطلع كم نور غير طبيعي، منظر مرعب و في نفس الوقت جميل جدا. التحدي بيكون انك تدخل النفق دا و تعدي للجزء المفتوح من البحر و تطلع تاني للسطح، للاسف اكتر من 200 غطاس كانو ضحية التحدي دا.

حاجات كتير اتقالت عن موضوع الغطاسين المحترفين اللي اختفوا في المكان، من اساطير اتقالت عن بنت بدوية اسمها شاهين، انتحرت في المكان دا من سنين و قالو ان روحها ساكنة المكان، و الرأي التاني عشان اسباب تقنية في الغطس نفسه، و دا طبعا الرأي الأرجح

  1.  كانيون

المكان في طريق البلو هول يعني غالبا ممكون تكون غطست فيه لو غطست في البلو هول و عباره عن شق فى الارض بتبتدي تشوفه على عمق 18 متر , تشوف شق ضلمة تماما كده جوا الارض والمدخل فوق وتبتدي تدخل جواه

الكانيون عموما ليه مدخلين اشهر واحد على عمق 18 متر والتاني على عمق 12 متر , وبرضو ليه مخرجين الاول على 48 متر والثاني على 55 متر
اول مره هتغطس فيه هتحس بهيبه المكان عشان انت نازل ف اللامعلوم مكان شايفه من فوق ضلمة وشق جوا قاع البحر على عمق كبير.
بس واحده من امتع واحلى الغطسات و ده برضوا مش للهواه ولازم يبقي معاك رخصة غطس.

  1. قبر البنت:

أو زي ما بينطقها أهل دهب “جبر البنت” و دي ليها أسطوره غريبة شوية.

أهل دهب بناتهم مبيظهروش ف أى مكان يعنى البنت من بعد 12 سنه كده مش هتلاقيلها اثر ف الشارع ولا تتشاف وعلى لسانهم “اصل حريمنا جواهر متظهرش”
ف بنت عشقت واحد أجنبى ولان ده مينفعش قرروا يعاقبوها ف من شده العقاب اللى كانت عارفه انه هيحصلها هربت تحت الميه يقال بقي حاجتين.. ان الشعب المرجانيه قفلت عليها عقاب ليها.. او انها ربطت نفسها تحت هروب من عقابهم وعشان كده اتسمى جبر البنت.

بعيدآ بقي عن ان دى قصه وخلاص… فالمكان ده من احسن اماكن الغطس و المكان ده ممكن توصل له عن طريق مركب أو جمل بس. و الرحلتين هتتبسط فيهم أكتر من بعض.

قبر البنت من الأماكن اللي ممكن نشوف فيه أسماك نادره زي العنقد او سمك السلماني و ده موطنه أصلا شرق أسيا و جزر المحيط الهادي عشان كده نادر تشوفه هنا بس ممكن تشوفه في قبر البنت.
من الاسماك النادره برضوا هناك سمك الراي و ده سمك رخوي و بيلسع كنوع من الدفاع عن النفس يعني حاسب تتلسع

  1.  لايت هاوس:

و هنا تبدأ  البشرى لهواة الغطس الغير محترفين .الحمد لله مش محتاج رخصة او إنك تبقي محترف عشان تغطس في اللايت هاوس أى أي مكان من ألاماكن الجايه اللي هنتكلم عليهم.

 المكان ده من أنسب الأماكن انك تتعلم الغطس بجميع مستواياته.
لما تجرب تنزل المياه هناك هتلاقى نفسك فى منطقة رملية و العمق بيزيد تدرجي لمنحدر عشبي كبير اللي هتقدر تشوف منه الأسماك والشعب المرجانية.

لو أول مره تغطس ننصحك بالمكان ده و أكيد هينزل معاك مدرب غطس محترف . ممكن يدربك الأول على التنفس و الأشارات تحت المياه و بتجرب في مكان الأول مش عميق لحد ما يتأكد إنك حفظت التعليمات و بعدين هتبدأ تتدرج في العمق.

أهم نصيحة إنك تسمع التعليمات كويس عشان تستمتع الغطسه و التجربه اللي لازم على الأقل تجربها مرة في حياتك.

المكان ده كمان في الممشي يعني مش هتحتاج وسيلة مواصلات و هو شاطئ يعني ممكن فيه السباحه او السنوركلينج و هتلاقي مطاعم كتير حواليه يعني انسب مكان لتقضية اليوم لو عايز تجرب الغطس لأول مرة.

  1. ثري بولز:

المكان إتسمى ثري بولز لان اتكون فيها 3 حمامات للسباحة في قلب البحر من الشعاب المرجانية.
و ده اللي مميز المكان و بيخلي الناس تعتبره لوحة من الجمال. ومناسب برضوا للناس اللي بتخاف من الاعماق لان عمقه حوالي ١٠ متر.
و يعتبر مكان قريب و سهل توصل له بعربيه. المسافه بينه و بين الممشي 18 كيلو ذهاب وعوده

  1. ايل جاردن:

الاسم معناه حديقة الثعابين. كلمة ايل هي كائن شبه التعبان بس مش سام ولا خطير . بيعيش تحت الرملة و مش بيخرج غير لما بيحس بالأمان و عشان كده كتير من الغواصين بيوصلوا للعمق و يقعدوا على الرمله يستنوا خروجه و ده المميز في المكان.

عمق المكان 25 متر بس برضوا يفضل النزول مع مرشد غطس لآن ساعات بيقي فيه تيار قوي.

المكان عباره عن حيد مرجاني يعني تشكيله من الشعب المرجانيه على الصخور و دي عمقها 10 متر تقريبا و الباقي أرض رمليه اللي موجود فيها الايل أو التعابين.

Leave a Comment